229.

新年無翻屋企同家人過, 都無同老友記出去倒數, 出去蒲, 就係食咗餐M記跟住通宵一晚然之后去T STREET擺攤.
我都覺得我勁有精力, 竟然可以唔瞓覺, 靠一杯咖啡撐足24+小時.

擺攤其實好好玩, 雖然係蝕本生意, 不過識到好多朋友, 又見到傳說中嘅 be, 收到幾張名片, 仲有外國朋友要同我交換 flickr, 最開心嘅其實係有好多人贊我啲相影得好好睇, 想問我拎名片添, 哈哈哈哈.

第一日擺攤興致好高, 雖然係無瞓, 不過點都係第一次, 有新鮮感, 同經過 c store 嘅朋友仔傾下計, 同佢哋介紹CD, 又同佢哋講埋我啲相喺邊度影, 喺邊度印, 完全唔介意佢哋買不買, 哈哈, 反正係無得賺.

第一日天氣好好, 好多人嚟, 我見到好多好多相機, 單反, 全畫幅, 卡片, 膠卷, 勁古老膠卷 ...... 仲見到 leica, 真係夠曬 high.
同左鄰右舍傾計好好玩, 左手邊係 jojo 賣自制配飾, 右手邊有靚仔賣創意打火機, 正!

第二日無咁積極, 瞓到差唔多9點先起身, 十點半都無人嚟逛, 所以我哋好悠閑咁坐喺度 hea, 有人經過我都無咁多熱情講咁多嘢, 見到有人有興趣埋嚟睇我先講嘢. 
不過居然都有人買CD, 真係多謝曬!

跟住第二日最開心嘅係下晝會長雞哥同埋會草波特嚟捧場! 賣剩一副黑框眼鏡! 收攤之后一起去食粥! 哈哈, 愛死你哋～

哩兩日令我感觸好深, 陌生人有陌生人嘅親切, 死黨有死黨嘅心寒, 諗到31號嗰晚我發曬短信邀請大家嚟 c store 玩, 最后都係無乜人嚟, 其實真係有唔爽.
所以係要特別多謝嚟玩嘅朋友, 多謝多謝!

下次有機會再擺過, 到時再見喔～
祝大家新年快樂!